More to Explore,  शोध अज्ञाताचा.....

गुलाबी तलाव : लेक हिलियर (Lake Hillier)

आजपर्यंत गुलाबी प्रेम, गुलाबी आँखेंं यांबद्दल ऐकलं होतं. आता गुलाबी तलावही यांच्या यादीत समाविष्ट झाला! हा सुद्धा निसर्गानेच निर्माण केलेला एक चमत्कार : लेक हिलियर. ऑस्ट्रेलियातील रिशर्श आर्किपेलागो (Recherche Archipelago) बेटावरील हा गुलाबी तलाव म्हणजे गुलाबी रंगाचा बबलगमच जणू! एका बाजूला अथांग पसरलेला निळाशार समुद्र , मध्ये दाट झाडी आणि दुसऱ्या बाजूला हा गुलाबी तलाव म्हणजेच लेक हिलियर.

हिलियर लेक व समुद्राला दुभागणारी दाट झाडी

या तलावाचे वैशिष्ट्य म्हणजे वर्षभर त्याचे पाणी गुलाबी रंगाचेच असते. तुम्ही थोडे पाणी अगदी तुमच्याकडच्या बाटलीत भरून पाहिले तरी त्याचा रंग काही बदलणार नाही. प्रश्न पडला असेल ना , कसं शक्य आहे म्हणून! म्हणतात ना देवाची करणी अन् नारळात पाणी ! तसंच काहीसं या तलावाचं. वैज्ञानिकांच्या म्हणण्याप्रमाणे तो एक क्षारयुक्त तलाव आहे. पाण्यातील उच्च पातळीची क्षारयुक्तता, खारट पाण्यावर उगवणारे शेवाळ ज्याला ड्युनेलिला सॅलिना (Duneliella Salina) असेदेखील म्हणतात व गुलाबी हॅलोबॅक्टेरिया (halobacteria) यांच्या प्रभावाने तलावातील पाणी गडद गुलाबी रंगाचे आहे. विशेष म्हणजे पाण्यातील क्षाराचे प्रमाण उच्च पातळीचे असले तरी हिलियर लेक पोहण्यासाठी सुरक्षित आहे.
जवळजवळ ६०० मीटर लांबी व २५० मीटर रुंदी असलेल्या या गुलाबी तलावाचा शोध १८०२ साली लागला. इतिहासातील नोंदीप्रमाणे या तलावाचा वापर मीठ गोळा करण्यासाठी केला जायचा. आता ते एक पर्यटनस्थळ म्हणून नावाजले गेले आहे. लेक हिलीयरपर्यंत पोहोचण्यासाठी खूप कमी मार्ग उपलब्ध आहेत. एरोप्लेन सिनिक फ्लाईट्स(Aeroplane Scenic Flights) हा पर्यटकांमध्ये प्रसिद्ध असलेला पर्याय आहे. त्याशिवाय क्रुझेसचाही पर्याय उपलब्ध आहे . तुम्ही काय निवडताय?
गुलाबी रंगाचा बबलगम भासावा असा लेक हिलियरचा नजारा

नमस्कार मंडळी, मी पूजा.... पूजा नरेश जाधव. आपल्या ट्रॅव्हल विथ ड्रीम्स या ब्लॉगच्या माध्यमातून नवनवीन पर्यटनस्थळांची माहिती तुमच्यासमोर आणतेय. गेल्याच वर्षी तोलानी वाणिज्य महाविद्यालयातून B. Com चं शिक्षण पूर्ण केलं. सध्या स्पर्धा परीक्षांची तयारी करतेय. त्यातून वेळ मिळाला की सरळ मोर्चा वळतो तो आपलं सगळ्यात आवडतं काम करायला ! हेच आपल्या ब्लॉगसाठी नवीन पोस्ट बनवण्याकडे.... यासोबत मला नवनवीन पदार्थ बनवायला आणि खायलाही खूप आवडतात. माझा दुसरा आवडता छंद म्हणजे झाडं लावणे आणि त्यांना न्याहाळत बसणे. अधूनमधून पुस्तकंही वाचते. त्यामध्ये परीकथा, साहसकथा आणि प्रवासवर्णनं वाचण्याकडे माझा जास्त कल असतो. या सगळ्यासोबत कॉलेजमध्ये असताना ज्यूडोचं प्रशिक्षणही घेतलं. नंतर पदवीच्या शेवटच्या वर्षाला असताना महाराष्ट्र टाइम्ससोबत "कॉलेज क्लब रिपोर्टर" म्हणूनही कामाचा अनुभव घेतला. या सगळ्या उद्योगांव्यतिरिक्त मला मनसोक्त भटकंती करायला आणि त्या त्या ठिकाणचे पारंपारिक पदार्थ चाखायलाही खूप आवडतं. तिथली संस्कृती अनुभवणं, लोकांच्या लहानसहान गोष्टींचं निरीक्षण करणं यात वेगळीच मजा येते. तशी स्वप्नं बरीच आहेत, पण त्यातलं एक म्हणजे आपला हा ब्लॉग यशस्वी करायचा. तुम्ही सगळे या प्रवासात आमच्यासोबत आहात, त्यामुळे काळजीचं काही कारणच नाही. ...... खूप बोलले ना. आता थोडं थांबते. तसे आपण भेटत राहूच नवीन पोस्टसोबत. तुम्हांला पोस्ट आवडली का हे जरूर कळवा हं. वाट बघतेय तुमच्या प्रतिक्रियेची.

Enjoy this blog? Please spread the word :)

RSS
EMAIL
Facebook
Facebook
Google+
Google+
http://travelwithdreams.com/lake-hillier
Instagram