More To Explore

जगात अशी अनेक आश्चर्य आहेत ज्यांची उत्तरं विज्ञानालाही अजून सापडली नाहीत. आता या वक्र अरण्याचंच बघा ना ! इथे ९० अंशात वाकलेली व उंच वाढलेली देवदार वृक्षांची जवळजवळ ४०० झाडं आहेत. त्यांचं वैशिष्ट्य हे की ही सर्व झाडं एकाच दिशेने वक्र झालेली आहेत.सलग २२ रांगांमध्ये उत्तरपूर्व दिशेने वाढलेली ही झाडं बुंध्याजवळ ३ ते ९ मीटरमध्येच बरोबर वक्र झाली आहेत. पाहताक्षणी वाटावं आरामदायी खुर्चीच जणू !

वक्र अरण्याचं हे रहस्य आपल्याला ८९ वर्ष मागे घेऊन जातं. असं म्हणतात, १९३० साली काही शेतकऱ्यांनी या जागी देवदार वृक्षांची रोपं लावली. ती सात वर्षांची झाल्यावर त्यांनी वेगळं फर्निचर बनवण्याच्या दृष्टीने या झाडांचा बुंधा असा वक्राकार केला. पण नेमका त्याच वेळी पोलंडने दुसऱ्या महायुद्धात प्रवेश केला. महायुद्धामुळे हे काम अर्धवटच राहिलं. हे खरं मानलं तरी ते ऐकायला वेगळं आणि आश्चर्यजनकच वाटतं. काहींचं म्हणणं आहे की हिमवादळांमुळे झाडांच्या बुंध्याजवळ बर्फ साचला. त्यामुळे जिथून जागा मिळाली तिथून ती वाढली. पण जर असं झालं असेल, तर ती एकाच दिशेने कशी वक्र झाली हा प्रश्न अनुत्तरितच राहतो. काही जण म्हणतात की , परग्रहावरून आलेल्या लोकांनी या झाडांना असा आकार दिला. शक्यता फार आहेत, पण नेमकं काय झालं कुणालाच ठाऊक नाही.
आता तुम्ही म्हणाल, तिथल्याच एखाद्या त्याकाळच्या रहिवाशाला विचारायचं ना ! इथेच तर घोळ आहे, कारण दुसऱ्या महायुद्धाच्या काळात संपूर्ण शहराचाच विध्वंस झाला. त्यामुळे अनेक दशकं हे शहर वैराण झालं होतं. १९७० च्या काळात इथे एक नवीन ऊर्जानिर्मिती प्रकल्प आला आणि तेव्हापासून शहराने नव्याने आकार घ्यायला सुरुवात केली. हे क्रूक्ड फॉरेस्ट अर्थात वक्र अरण्य या प्रकल्पापासून अगदी जवळ आहे

आता अनेक पर्यटक इथल्या निसर्गसंपन्न स्थळांना भेटी देतात पण, कुठलंही पर्यटनस्थळ या क्रूक्ड फॉरेस्टइतकं रहस्यमय नाही. तुम्ही या अरण्यात प्रवेश करताक्षणी नानाविध कल्पना आणि शक्यता डोक्यात घर करू लागतात. तुम्ही तेव्हा काय झालं असेल याचा ठाव घेण्याचा प्रयत्न करता पण, हाती मात्र काहीच लागत नाही. शेवटी मनात एकच विचार येतो, कदाचित या झाडांना बोलता आलं तर !
असं हे वक्र अरण्य आहे झाशोनिओपोमोरस्की (zachodniopamorskie) प्रातांत वसलेल्या ग्रिफिनो (Gryfino) उपनगरात. जेव्हा तुम्ही पोलंडला जाल, तेव्हा नक्की पहा हे क्रूक्ड फॉरेस्ट अर्थात वक्र अरण्य !